ဘောနပ်စ်ရကြပြီလား။ ဘာတွေသုံးလိုက်ပြီလဲ။

ပြီးခဲ့တဲ့နှစ်တစ်နှစ်လုံး လုပ်ငန်းခွင်ထဲမှာ ကြိုးစားလုပ်ဆောင်ခဲ့ပြီးလို့ အခုလို နှစ်သစ်တစ်နှစ်ရဲ့အစမှာ အားလုံးက လန်းဆန်းတက်ကြွတဲ့ ခွန်အားတွေနဲ့ ပိုကောင်းတဲ့အနာဂတ်၊ အခွင့်အလမ်းတွေကို ရှာဖွေဖို့ အဆင်သင့်ဖြစ်နေကြမယ်လို့ ယုံကြည်ပါတယ်။ ဒါ့အပြင် ဒီလိုနှစ်အစတွေမှာ အရင်နှစ်က ကြိုးစားထားတာတွေကို အသိအမှတ်ပြုတဲ့အနေနဲ့ ဘောနပ်စ်၊ ခံစားခွင့်၊ ရာထူးတိုး စတာတွေကိုလည်း ပေးလေ့ရှိကြတဲ့အချိန်ပါ။

အပိုထပ်ဆောင်းပေးလေ့ရှိတဲ့ဘောနပ်စ်က ကိုယ်ပုံမှန်ရတဲ့ လစာဝင်ငွေလို လတိုင်းရနိုင်မှာမဟုတ်လို့ ဘောနပ်စ်ရလာခဲ့ရင် ဘယ်လိုလေးသုံးမယ်ဆိုပြီး သေသေချာချာ ခွဲခြမ်းထားဖို့ လိုပါလိမ့်မယ်။

အဲ့ဒီလိုမှမဟုတ်ရင်တော့ မလိုတာတွေသုံးမိပြီး အပိုဘောနပ်စ်ငွေလေးက လေထဲမှာ ခဏလေးနဲ့ ပျောက်သွားမှာပါ။ ဒါကြောင့် ရသမျှဘောနပ်စ်တွေ အကျိုးရှိရှိ အသုံးချနိုင်မယ့် နည်းလမ်းကောင်းလေးတစ်ချို့ကို ဝေမျှလိုက်ပါတယ်။

၁။ ရှိတာထက် ပိုမသုံးဘူး

ဒါကတော့ ဘောနပ်စ်ရမှမဟုတ်ပါဘူး။ လစာဖြစ်ဖြစ်၊ အခြားဝင်ငွေတစ်ခုခုရတဲ့အခါမှာဖြစ်ဖြစ် ကိုယ့်ရဲ့ဝင်ငွေကို ကျော်လွန် ပြီးသုံးစွဲတာမျိုးမလုပ်မိဖို့ အရေးကြီးပါတယ်။

၂။ အကြွေးတွေကို မြန်မြန်ရှင်း

ကိုယ်ချေးထားတဲ့ အကြွေးတွေကို ပိုက်ဆံရတုန်း တတ်နိုင်သမျှ မြန်မြန်ဆပ်ထားလိုက်တာက ကိုယ့်ကို အကြွေးတွေကြားကနေ လွတ်လပ်စေပြီး ပေါ့ပါးတဲ့ ကြွေးကင်းအပူရှင်းတဲ့ဘဝကို ရစေပါလိမ့်မယ်။ အကြွေးတွေကို အရင်မဆပ်ဘဲ ပစ်ထားမိရင်တော့ အကြွေးပေါ် အကြွေးဆင့်ပြီး သင့်ကို ပိုကျပ်တည်းလာစေပါလိမ့်မယ်။

၃။ အ‌ရေးပေါ်သုံးငွေ ကြိုဖယ်ထားမယ်

အရေးပေါ်သုံးငွေဆိုပေမဲ့ အရေးပေါ်မှ သုံးရမှာမျိုးမဟုတ်ဘဲ ကိုယ့်အတွက် တစ်ခုခုလိုအပ်လာတဲ့အခါ အဲ့ငွေထဲကနေယူပြီး သုံးလို့ရအောင် အရန်ငွေအဖြစ် ဖယ်ထားတဲ့ငွေဆို ပိုမှန်ပါလိမ့်မယ်။ တစ်ခုခုဖြစ်လာခဲ့ရင် သုံးဖို့ လိုရမယ်ရဆိုပြီး အခုကတည်းက ဝင်ငွေထဲကနေ ဖယ်ထားမယ်ဆိုရင် အရေးအကြောင်းကြုံလာတဲ့အခါ ကိုယ့်အတွက် အကူအညီတစ်ခုရစေမှာပါ။

၄။ အိုစာမင်းစာကြိုစုတတ်တဲ့အလေ့အထ

ကိုယ်က အရွယ်ငယ်ငယ်လေးရှိသေးတာ အိုမင်းမစွမ်းအချိန်အထိ လှမ်းတွေးဖို့လိုလို့လား ဆိုရင်တော့ အဖြေက လိုတယ်လို ပြောရမှာပါ။ ကြိုပြင်ဆင်ထားတာတော့ မမှားပါဘူး။ ကိုယ်ရတဲ့ငွေကို အသက်ကြီးလာမယ့်အချိန်အတွက် ကြိုတွေးပြီး နည်းနည်းလေးပဲဖြစ်ဖြစ် စုဆောင်းတတ်မယ်ဆို ပင်စင်ယူရတဲ့အရွယ်မျိုးကျ ကိုယ့်အတွက် အခက်အခဲနည်းသွားမှာ အသေ အချာပါပဲ။

၅။ ကိုယ့်ကိုကိုယ် ဆုချဖို့မမေ့ပါနဲ့

မှန်ပါတယ်။ ဒီဝင်ငွေတွေကို ကိုယ်တိုင်က ကြိုးစားရှာဖွေစုဆောင်းထားတာဖြစ်လို့ တစ်ခါတစ်ရံမှာ ကိုယ့်အတွက် ကိုယ်ကိုတိုင် ပြန်ပြီး ဆုချသင့်ပါတယ်။ အကောင်းဆုံးဆိုင်မှာ ညစာသွားစားပစ်လိုက်တာမျိုး၊ ရှော့ပင်ထွက်လိုက်တာမျိုးတွေက ကုန်သွားရ တဲ့ငွေကြေးနဲ့ကိုက်ညီတဲ့ စိတ်ကျေနပ်မှုကို သင့်အတွက် ပြန်ယူလာပေးနိုင်ပါတယ်။

စာဖတ်သူနှင့် သင့်တော်နိုင်မည့် အာမခံအမျိုးအစားများ