Digital Detox: Digital Cleanse ဘာကြောင့်လုပ်ဖို့လိုတာလဲ၊ ဘယ်လိုလုပ်မလဲ 

မော်လ်ဒန်ခေတ်ကြီးထဲမှာ စိတ်ဖိစီးမှုဆိုတာ ဖုန်းရဲ့ ဖန်သားပြင်တွေ၊ အချက်ပေးသံတွေကနေတစ်ဆင့် နေ့စဉ်ရက်ဆက် မဖိတ်ခေါ်ဘဲ ရောက်ရောက်လာတတ်တဲ့ ဧည့်သည်လိုပါပဲ။ ဒီလို စိတ်ဖိစီးမှုတွေကြားကနေ ရုန်းထွက်နိုင်ဖို့အတွက်တော့ Digital Detox ဆိုတာ Trend တစ်ခုဆိုတာထက် မဖြစ်မနေ လုပ်ဖို့လိုအပ်တဲ့ ဂရုစိုက်မှုတစ်မျိုးပါ။

Digital Detox ရဲ့ အဓိပ္ပာယ်

Digital Detox ဆိုတာ တစ်ချိန်တုန်းက ရှိခဲ့ဖူးတဲ့ စိတ်တည်ငြိမ်မှုတွေ၊ အကောင်းမြင်စိတ်တွေကို ပြန်မွေးမြူနိုင်ဖို့အတွက် လျှပ်စစ်ဖန်သားပြင်တွေ၊ ဒစ်ဂျစ်တယ်ပစ္စည်းတွေနဲ့ ဆိုရှယ်မီဒီယာ စတာတွေကို ရည်ရွယ်ချက်ရှိရှိ အသုံးမပြုဘဲ နေထိုင်ခြင်းဖြစ်ပါတယ်။

Digital Detox ပြုလုပ်ရခြင်း အကြောင်းရင်း

နေ့ရက်တွေတိုင်းမှာ ဖုန်းဖန်သားပြင်တွေ၊ အချက်ပေးသံတွေ၊ နည်းပညာရဲ့ ရိုက်ခတ်မှုတွေနဲ့ပဲ လုံးလည်ချာလည်လိုက်နေခဲ့ရတာ ဘယ်လောက်တောင်ကြာနေပြီလဲဆိုတာ ခဏလောက်တွေးကြည့်လိုက်ပါ။ ဒါကြောင့် အချက်ပေးသံတွေ၊ ဖန်သားပြင်တွေဆီကနေ ရုန်းထွက်ပြီး Digital Detox နဲ့အတူ ငြိမ်းချမ်းမှုကို ရှာဖွေကြည့်လိုက်ပါ။ 

ဒါဆို မျက်လုံးလေး အရင်မှိတ်ပြီး အေးချမ်းတဲ့ ပတ်ဝန်းကျင်တစ်ခုကို စိတ်ကူးပုံဖော်ကြည့်လိုက်ရအောင်။ လူမှုကွန်ရက်တွေက အချက်ပေးသံတွေကို ကြားနေရမယ့်အစား သစ်ရွက်လေး လှုပ်ခတ်သွားတဲ့ အသံလေးတွေကို ကြားယောင်ကြည့်လိုက်ပါ။ ပြီးတော့ ဖုန်းဖန်သားပြင်က ထွက်လာတဲ့ အလင်းရောင်တွေအစား နေဝင်ချိန်ဆည်းဆာရဲ့ တောက်ပနေတဲ့ ရောင်စဉ်တွေကို ခံစားကြည့်လိုက်ပါ။ ဒစ်ဂျစ်တယ် Detox ဆိုတာက ခဏတာ အနားယူခြင်းဆိုတာထက် ငြိမ်သက်ခြင်းဆီ ပို့ဆောင်ပေးနိုင်တဲ့ လမ်းစဉ်တစ်ခု၊ ကိုယ့်အတွင်းစိတ်ရဲ့ ငြိမ်းချမ်းမှုနဲ့ ပတ်ဝန်းကျင်ရဲ့ ဆိတ်ငြိမ်မှုတွေကို ပြန်လည်ချိတ်ဆက်ပေးနိုင်တဲ့ လမ်းကြောင်းတစ်ခုလိုပါပဲ။

Ping တွေ၊ Like တွေရဲ့ အချက်ပေးသံတွေမရှိဘဲ ငြိမ်သက်အေးချမ်းနေတဲ့ ပတ်ဝန်းကျင်တစ်ခုဟာ လူကိုပိုပြီး အသက်ရှူချောင်စေပါတယ်။ စိတ်အေးအေးချမ်းချမ်းနဲ့ လက်ရှိပစ္စုပ္ပန်ကိုပဲ အာရုံစိုက်နိုင်ပြီး သတင်းအချက်အလက်တွေကြောင့် ရရှိနိုင်တဲ့ စိတ်ဖိစီးမှုဒဏ်တွေရဲ့ အဝေးမှာနေနိုင်ဖို့ Digital Detox က စွမ်းဆောင်ပေးနိုင်ပါတယ်။

Digital Detox ရဲ့ အကျိုးကျေးဇူးများ

ရိုးရှင်းတဲ့ ဘဝရဲ့ ပျော်ရွှင်မှု

ဒစ်ဂျစ်တယ် လောကကြီးကနေ ခဏလောက် အနားယူလိုက်ပြီးတဲ့နောက်မှာ မနက်စောစောမှာ သောက်လိုက်ရတဲ့ လက်ဖက်ရည် တစ်ခွက်ဟာ ပျော်ရွှင်မှုကိုပေးနိုင်ပြီး ပန်းခြံထဲ လမ်းခဏလျှောက်လိုက်ရင်းလည်း အတွေးသစ်၊ အမြင်သစ်တွေ ပေါ်လာနိုင်ပါတယ်။ Digital Detox ပြုလုပ်တယ်လို့ပြောလိုက်တာနဲ့ အင်တာနက်မသုံးဘဲ နေခြင်းလို့ပဲ ပြေးမြင်ကြတယ်ဆိုပေမဲ့ Digital Detox ဆိုတာ အရင်က မမြင်မတွေ့ဖူးခဲ့တဲ့ ဘဝထဲကအလှကို တွေ့အောင်ရှာဖွေခြင်း တစ်မျိုးပါပဲ။ 

အကောင်းမြင်စိတ်တို့ရဲ့ အိုအေစစ်

အချက်ပေးသံတွေကို ဘယ်ဘက်ပွတ်ဆွဲပြီး ပိတ်လိုက်တိုင်းမှာ အကောင်းမြင်စိတ်တွေနဲ့ ပြည့်နှက်နေတဲ့ အိုအေစစ်လေးဆီရောက်နိုင်ဖို့ တစ်လက်မစီလောက် ပိုပိုပြီးနီးလာပါလိမ့်မယ်။ Digital Detox ကို သေချာလေးသာ ပြုလုပ်ပေးမယ်ဆိုရင် အတွင်းစိတ်မှာလည်း အပြုသဘောဆောင်တဲ့ သဘောထားတွေ ပိုများလာမှာပါ။ ပျော်ရွှင်စေမယ့် အရာတွေကို ပြုလုပ်ရင်း၊ ရယ်မောသံတွေကို ချစ်ရသူတွေနဲ့အတူ မျှဝေခံစားရင်း ရိုးရှင်းတဲ့ အခိုက်အတန့်လေးတွေကတစ်ဆင့် အကောင်းမြင်စိတ်တွေနဲ့ ပြည့်နှက်နေတဲ့ စိတ်ချမ်းသာစရာ ဘဝလေးဆီကို လျှောက်လှမ်းသွာလိုက်ပါ။

Digital Detox ဘယ်လိုပြုလုပ်ကြမလဲ? Digital Detox ပြုလုပ်နိုင်မယ့် အကြံပြုချက်နှင့် ဥပမာ (၃) ခု

၁။ ဖုန်းအသုံးပြုတဲ့ အချိန်ကို လျှော့ချလိုက်ခြင်းနဲ့ Digital Detox စတင်လိုက်ပါ။

ဖုန်း ဒါမှမဟုတ် ကွန်ပျူတာတွေသုံးတဲ့ အချိန်တွေကို အချိန်အတိုင်းအတာ တစ်ခုသတ်မှတ်လိုက်ပြီး အသုံးပြုချိန်ကို ဖြည်းဖြည်းချင်း လျှော့ချကြည့်ပါ။ နည်းပညာနဲ့ လက်တွေ့ဘဝကို လိုက်လျောညီထွေဖြစ်နိုင်ဖို့အတွက် နည်းပညာမပါတဲ့ ပြင်ပလှုပ်ရှားမှုလေးတွေကို စတင်လုပ်ဆောင်ကြည့်ပါ။ ဖန်သားပြင်ရဲ့ ပြင်ပလက်တွေ့ ကမ္ဘာကြီးနဲ့ ပြန်လည်ချိတ်ဆက်နိုင်ဖို့အတွက် ဒီနည်းလမ်းကို အသုံးပြုနိုင်ပါတယ်။

၂။ ကိုယ့်ကိုယ်ကိုယ် ဖော်ပြနိုင်တဲ့ နည်းလမ်းအသစ်တွေကို ရှာဖွေပါ။

ကိုယ့်ရဲ့ ဘဝအကြောင်းကို Social Media ပေါ်မှာ တခြားလူတွေ တွေ့မြင်နိုင်အောင် မျှဝေတာက ကျောင်းသားလူငယ်တွေ၊ ဆယ်ကျော်သက်တွေနဲ့ စိမ်းတဲ့ကိစ္စတစ်ခုတော့ မဟုတ်ပါဘူး။ ဒါပေမဲ့ Newsfeed ကိုပဲ တစ်ချိန်လုံးကြည့်နေမိတဲ့အချိန်မှာ တခြားလူတွေရဲ့ ဘဝက ကိုယ်ထက်ပိုပြီး သာနေတယ်လို့ ထင်သွားတတ်ကြပါတယ်။ ဒီလို နှိုင်းယှဉ်မှုတွေကနေတစ်ဆင့် လက်ရှိဘဝကို မရောင့်ရဲတော့တာမျိုး၊ မိမိကိုယ်ကို လေးစားမှုနည်းပါးလာတာမျိုးတွေနဲ့ မကျေနပ်ဖြစ်တာမျိုးတွေကို ခံစားလာရစေနိုင်ပါတယ်။

ဆိုရှယ်မီဒီယာကို စွဲစွဲလမ်းလမ်း အသုံးပြုတတ်တဲ့ အကျင့်ကို လျှော့ချလိုက်ပါ။ ပြီးရင် ကိုယ့်ကိုယ်ကိုယ် အဆိုးမြင်စေမယ့် Account တွေကို Unfollow လုပ်လိုက်ပြီး လက်တွေ့ဘဝထဲက အဖြစ်အပျက်တွေကိုပဲ အာရုံစိုက်ထားလိုက်ပါ။ တရားထိုင်ခြင်း၊ အသက်ပြင်းပြင်းရှူခြင်း ဒါမှမဟုတ် ယောဂကျင့်ခြင်းမျိုးတွေကို ပြုလုပ်ပြီး လက်ရှိအခိုက်အတန့်မှာပဲ နေထိုင်နိုင်ဖို့ ကြိုးစားပါ။ တက်တက်ကြွကြွရှိနိုင်ဖို့အတွက် လမ်းလျှောက်ထွက်တာမျိုး၊ သဘာဝကို ခံစားရင်း အချိန်ကုန်ဆုံးတာမျိုးတွေကို လုပ်ကြည့်လို့လည်း ရပါတယ်။

၃။ အိမ်မှာ နည်းပညာလုံးဝမရှိတဲ့ နေရာတွေကို ဖန်တီးထားပါ။

အီလက်ထရောနစ် စက်ပစ္စည်းတွေ လုံးဝမရှိတဲ့ သီးခြားနေရာတွေကို ဖန်တီးသတ်မှတ်ပြီး ကိုယ်နဲ့ ကိုယ်ချစ်ရတဲ့ သူတွေအတွက် Digital Detox လုပ်ရင်း အချိန်ကုန်ဆုံးနိုင်မယ့် နည်းပညာကင်းမဲ့ဇုန်တွေကို အိမ်မှာ ဖန်တီးထားလိုက်ပါ။ မျက်နှာချင်းဆိုင် အပြန်အလှန်ပြောဆိုနိုင်ပြီး နည်းပညာလုံးဝမပါဝင်တဲ့ လုပ်ရှားမှုတွေမှာ ပါဝင်ကြည့်ပါ။

ဥပမာ နှစ်နှစ်ခြိုက်ခြိုက်အိပ်ပျော်နိုင်ဖို့အတွက် အိပ်ခန်းထဲရောက်တာနဲ့ ဒစ်ဂျစ်တယ်နဲ့ ပတ်သက်တာမှန်သမျှကို လုံးဝအသုံးမပြုတော့တာမျိုးကို ပြုလုပ်ကြည့်နိုင်ပါတယ်။

ကဲ ဒါဆို တစ်ရက်လောက် Digital Detox လုပ်ကြည့်ဖို့ Challenge ခေါ်လိုက်ပါတယ်။ အချက်ပေးသံတွေ၊ Notification တွေကို ပိတ်ထားလိုက်ပါ။ Screen တွေကို ပိတ်ထားလိုက်ပါ။ တကယ့်ဘဝရဲ့ ငြိမ်သက်အေးချမ်းမှုတွေနဲ့ စိတ်ဝိညာဉ်ကို အားဖြည့်ကြည့်လိုက်ပါ။ ဒီလို ရည်ရွယ်ချက်ရှိရှိ နည်းပညာတွေနဲ့ ဖြတ်တောက်ထားတဲ့ အချိန်လေးကို အပန်းဖြေရုံသက်သက်မဟုတ်ဘဲ ပိုပြီးအပြုသဘောဆောင်တဲ့ အကောင်းမြင်စိတ်တွေကို ရှာဖွေတွေ့ရှိနိုင်ဖို့ အသုံးချကြည့်လိုက်ပါ။

ပိုပြီး သက်တောင့်သက်သာ ရှိတဲ့၊ အပြုသဘောဆောင်တဲ့၊ ပျော်စရာကောင်းတဲ့ ဘဝတစ်ခုဆီ သွားမယ့် ခရီးအတွက် Digital Detox ကို Passport တစ်ခုအဖြစ် အသုံးချကြည့်လိုက်ရအောင်နော်။