အပျော်တွေ...ပျောက်နေပြီလား 

အပျော်တွေ...ပျောက်နေပြီလား

ပျော်ရွှင်ခြင်းတွေပြည့်နှက်နေတဲ့အခါ ‌နေ့ရက်တိုင်းကို တက်ကြွတဲ့စိတ်ခွန်အားတွေနဲ့ ဖြတ်သန်းနိုင်ကြစမြဲပါ။

အမြဲတမ်းတော့ ပျော်ရွှင်နိုင်ပါ့မလားဆိုတဲ့ မေးခွန်းရော ကိုယ့်ဘာသာကို မေးကြည့်နေမိပြီလား။ ပျော်ရွှင်မှုရရှိလာဖို့ အရင်းအမြစ်တွေက အဝေးကြီးမှာရှာစရာမလိုပါဘူး။ ဒီတော့ သင်က ပျော်ရွှင်ပြီးနေရတာကို သဘောကျနှစ်သက်သူဆိုရင် အခုပဲ အောက်မှာရေးထားတဲ့ ပျော်ရွှင်ဖို့ရာ ခန္ဓာကိုယ်ထဲက ဟော်မုန်းတွေကို မြင့်တက်စေမဲ့ နည်းလမ်းတွေကို လိုက်လုပ် ကြည့်ရအောင်။

ပျော်ရွှင်ခြင်းကိုပေးတဲ့ Dopamine

စိတ်ကိုကြည်လင်စေတဲ့ Dopamine ဟော်မုန်းက ခန္ဓာကိုယ်ထဲ မြင့်တက်လာတာနဲ့အမျှ စိတ်ကို ကြည်လင်စေပြီး ကောင်းမွန် တဲ့ စိတ်ခံစားမှုတွေကိုရမှာပါ။ ဒီတော့ Dopamine ဟော်မုန်းမြင့်လာဖို့ဆို အောက်က အချက် (၄) ချက်ကို လုပ်ရုံပါပဲ။

• အိပ်ရေးဝဝအိပ်မယ်
• ကိုယ့်စိတ်ကြိုက်သီချင်းတွေနားထောင်မယ်
• အရသာရှိတဲ့ အစားအသောက်ကောင်းတွေ စားမယ်
• နံနက်ခင်းနေရောင်နွေးနွေးအောက်မှာ ကိုယ်လက်လှုပ်ရှားမယ်

စိတ်ဖိစီးမှုလျော့ချပေးမဲ့ Endorphin

လူသားတိုင်းမဖြစ်မနေကြုံရမှာက စိတ်ဖိစီးခြင်းပါ။ တစ်ချိန်မဟုတ်တစ်ချိန် ကြုံလာရနိုင်တဲ့ စိတ်ဖိစီးမှုကို ရှောင်လွှဲမရနိုင် သော်ငြား လျော့ချဖို့ကိုတော့ တတ်နိုင်ပါတယ်။ ကိုယ့်ခန္ဓာကိုယ်ထဲမှာ Endorphin ဟော်မုန်းမြင့်တက်လာတာနဲဲ့အမျှ စိတ်ဖိစီးမှု က လျော့ကျသွားမှာဖြစ်လို့ အောက်က အချက်တွေကို စိတ်ဖိစီးတဲ့အချိန်တိုင်း လုပ်ကြည့်ဖို့မမေ့ပါနဲ့။

• များများရယ်ပါ
• ကိုယ်ချစ်မြတ်နိုးရသူတွေနဲ့ အတူရှိပါ
• စိတ်တည်ငြိမ်စေမဲ့ တရားထိုင်ခြင်းမျိုးကိုလုပ်ပါ
• သီချင်းတွေဆိုပြီး ကခုန်ပစ်ပါ

အပူအပင်တွေဝေး စိတ်အေးစေမဲ့ Serotonin

သောကတွေပိနေတဲ့ စိတ်ကြီးနဲ့တော့ ပျော်ရွှင်နိုင်ဖို့ဆိုတာ မဖြစ်နိုင်ပါဘူး။ ဒီတော့ သောကကင်းဝေးပြီး စိတ်တည်ငြိမ်အေးချမ်း နေမယ်ဆို ကိုယ့်စီကို ပျော်ရွှင်ခြင်းတွေက တစိမ့်စိမ့် ဝင်ရောက်လာနိုင်မှာပါ။ ဒီတော့ သောကနည်းပြီး စိတ်အေးချမ်းစေမဲ့ Serotonin ဟော်မုန်းကို မြင့်တက်လာစေဖို့ဆို ဒီနည်းလမ်းတွေက အကောင်းဆုံးပါပဲ။

• နေရောင်ခြည်နဲ့ ထိတွေ့ပါ
• တရားထိုင်ပါ
• ကိုယ်လက်လှုပ်ရှားလေ့ကျင့်ခန်းလုပ်ပါ
• ကျန်းမာရေးနဲ့ ညီညွတ်တဲ့ အစားအစာတွေကို စားပါ

ချစ်ခြင်းမေတ္တာနဲ့နွေးထွေးစေမဲ့ Oxytocin

ကိုယ့်ကိုချစ်တဲ့သူ၊ ကိုယ်ချစ်ရသူတွေကြားမှာ နွေးနွေးထွေးထွေးဖြစ်ပေါ်လာတဲ့ ချစ်ခြင်းမေတ္တာက လူသားတွေအတွက် အပျော်ရွှင်စေဆုံး အကြောင်းတရားတစ်ခုပါ။ ပျော်ရွှင်မှုကို တကယ်နှစ်သက်သူတွေက ချစ်ခြင်းမေတ္တာဟော်မုန်းတွေ လျော့ပါး မသွားဖို့ ဂရုစိုက်ဖို့လိုတာကြောင့် Oxytocin ဟော်မုန်း မြင့်တက်လာဖို့ ဒီအချက်တွေကို မမေ့မလျော့ လိုက်လုပ်ကြည့်ပါဦး။

• ကိုယ်ချစ်ခင်မြတ်နိုးသူတွေနဲ့ ပွေ့ဖက်မယ်
• တစ်ဦးနဲ့တစ်ဦးကြား ချီးကျူးစကားဆိုကြမယ်
• အများအကျိုးအတွက် တတ်နိုင်သမျှတွေ လုပ်မယ်
• သူငယ်ချင်းတွေနဲ့ တွေ့မယ် 

စာဖတ်သူနှင့် သင့်တော်နိုင်မည့် အာမခံအမျိုးအစားများ